محمد عبد المنعم: الثقب الأسود ببساطة

- القصة ببساطة ان فيه حد مجنون القرن الي فات إسمه آينشتاين طلع قال ان الزمن مش ثابت زي ماحنا عارفين
- يعني الزمن مش مجرد خط ماشي وإحنا بنتولد ونموت وهو مستمر في المرور زي ماهو، لأ ده الزمن ممكن ينضغط أو يتمدد عادي حسب سرعة الجسم الي بيمر عليه الزمن

- بمعني ان الزمن مقترن بالسرعة، يعني لو حد معين قدر يسافر دلوقتي بسرعة الضوء، الي هي (٣٠٠ ألف كيلومتر في الثانية) الزمن عنده هيتوقف وهيرجع بعد ٣٠ سنة مثلا في نفس السن بتاعه في الوقت الي الناس هنا على الأرض هيكونوا عجزوا، وطبعا لو حد قدر يسافر بسرعة أكبر من الضوء هيسافر النهاردة وهيرجع سنة ٢٠٠٠ مثلاً، وده هيأكد نظرية السفر عبر الزمن الي أكلت دماغ الفيزيائيين

- لكن طبعا الكلام ده لحد دلوقتي مستحيل تطبيقه لأن نظرياً مفيش جسم يقدر يسير بسرعة الضوء لأنه هيحتاج طاقة توازي طاقة الكون بتاعنا، وكمان جزيئات الجسم ده نفسها هتتفكك، بس الله أعلم المستقبل ممكن يجيب ايه جديد

- طبعا الكلام ده أي حد عاقل مش هيصدقه، لحد ما عملوا تجربة فعلية عن طريق مكوك فضائي حطوا فيه ساعة ذرية وحطوا نفس الساعة دي على الأرض وانطلق المكوك بأقصى سرعة، لكن طبعا سرعة لا تضاهى حتى ١/١٠٠٠ من سرعة الضوء المطلوبة، وكانت النتيجة والكارثة بعد ما المكوك رجع، ان الساعات توقيتهم اختلف عن بعض فعلاً

- حصلت ضجة كبيرة ونقلة غير عادية في الفيزياء ونظريات كتير اتهدت بسبب الاكتشاف ده ومنهم طبعا نيوتن الي بنى كل نظرياته على ان الزمن خط ثابت والكون بيمر من عليه

- اتكلموا وقتها عن حاجة في الفضاء إسمها الثقوب السوداء وقال ان الثقوب دي بتكون نهاية أو موت النجوم الكبيرة الي كتلتها تفوق الشمس بتاعتنا ملايين المرات، نتيجة ان الوقود النووي بتاعها بيخلص فالنجم بيندثر وبيكون ثقب أسود عااااااااااااالي الجاذبية وبيجذب كل الأجسام المحيطة بيه من كواكب وأجرام سماوية، لدرجة كمان أنه بيجذب الضوء نفسه الي بيمر من جنبه، يعني حتى انعكاس الضوء الي بيخلينا نشوف أي حاجة مش هيبقي متاح عشان نقدر نشوف الثقب ده
- وطبعا أثبتوا ده من خلال الاضطرابات الي بتحصل في منطقة ما في الفضاء وقالوا يبقي ده بيحصل نتيجة الثقب الإسود ده فعلاً
- لحد ما جه عالم مجنون أكتر إسمه ستيفن_هوكينج وقال ان الكون بتاعنا ده فيه نسخ لا نهائية منه وان فيه أكوان متعددة كتير وإحنا متكررين في عوالم تانية بنفس أشكالنا مع إختلافات بسيطة
- وقال كمان ان الثقوب السوداء دي هي البوابات الي بتنقلنا للعالم التاني الموازي ده، خصوصا ان الأجسام الي بتدخل الثقوب دي مش بتمر من الناحية التانية مثلا، يعني بتختفي، يبقي فعلا بالعقل كده بتروح فين
- وطبعا قسموا الكون لـ ١٠ أبعاد وأثبتوا نظريا نظرية الأكوان المتعددة، بس طبعا دي محتاجة فيديو لأنها صعبة تتشرح في بوست كده

- المهم لحد امبارح كان كل الكلام ده مجرد نظريات على ورق، ومحدش شاف الثقوب دي حقيقة عشان يتم التأكيد علي كلام المجانين دول
- الثقب الي تم رصده النهاردة محتاج تليسكوب تقريبا بحجم قارة (آسيا وأفريقيا وأمريكا) مع بعض، يعني نص الكوكب بتاعنا عشان تقدر ترصده

- هما صمموا ٨ تليسكوبات بيشتغلوا مع بعض ببرنامج معين ووزعوهم علي مناطق معينة في الكوكب، عشان يضاهي العدسة الي المفروض تقدر تعمل ده
- التليسكوب ده قوي لدرجة أنه يقدر يرصد من على الأرض هنا، كرة تنس موجودة فوق سطح القمر
- وعن طريق البرنامج ده قدروا ياخدوا اللقطة دي مجمعة منهم كلهم، وده أخد وقت وترتيب ٧ سنين علي فكرة

- الثقب ده بيبعد عن الأرض حوالي ٥٣ مليون سنة ضوئية، يعني إحنا كده شايفين تاريخ الثقب ده من ٥٣ مليون سنة مش شايفينه في الوقت الحالي

- يعني لو حد موجود هناك عند الثقب ده دلوقتي، هيشوف الأرض وهي لسة في بداية تكونها منذ ٥٣ مليون سنة، قبل خلق الإنسان أو الكائنات الحية من الأساس على الأرض، وده برده محتاج فيديو عشان يتشرح فيه لأنه موضوع كبير

- أرجو يكون الموضوع مبسط، ولو فيه إستفسار أو حاجة مش واضحة ممكن نتناقش في الكومنتات

*تحديث
- الناس الي فهمت الكلام معناه ان السنة الضوئية قياس وقت مش مسافة غالبا دول حافظين مش فاهمين
- السنة الضوئية هي مقدار المسافة الي بيقطعها الضوء في سنة كاملة .. وفي نفس الوقت برده لو انت واقف في مكان علي بعد سنة ضوئية مننا هتشوف الي بيحصل من سنة فاتت
- يعني انت دلوقتي شايف الشمس قبل ٨ دقايق من الي بيحصل عندها دلوقتي، وممكن تكون شايف نجوم في السماء حاليا وهي في الحقيقة اختفت من عشرات السنين .. وصلت ؟

#منقول_للامانة